Día mundial da narración oral

Seguindo coas nosas conmemoracións non quixemos deixar pasar a celebración mundial do día da tradición oral. Para iso puxémonos en contacto coa vivenda tutelada de maiores da Pontenova e gracias a Raquel, a súa directora, puidemos invitar a Ramallal e a Pepe a achegarse onda nós. O alumnado de 1º e 2º da ESO mantivo con eles dous unha amena charla sobre as súas vidas, as distintas formas de ocio durante a súa xuventude e os cambios que se produciron na sociedade nestes últimos anos. Foi unha sesión moi entrañable na que temos que destacar a amabilidade dos nosos invitados así coma o interese mostrado polo noso alumnado de cara ás historias que nos narraron. Coma sempre, deixamos constancia da actividade nas seguintes imaxes:

Advertisements

Obradoiros de escritura cuneiforme

Para achegar a todo o alumnado do centro o interesante mundo da escritura cuneiforme, a Biblioteca organizou diversos obradoiros impartidos por Pedro Blanco Rubio, profesor de sumerio e de escritura cuneiforme no Instituto Bíblico y Oriental de León. Despois de explicarlles as orixes desta lingua e usando cuñas de madeira e arcilla, o alumnado creou as súas propias pezas con mensaxes escritos seguindo esta técnica ancestral. Nas seguintes imaxes podes ver o resultado destes obradoiros que, sen dúbida, foron todo un éxito.

Día da ilustración con Mónica Justo

O día 30 de xaneiro celébrase en Galicia o Día da ilustración e para achegar este apaixoante mundo ao noso alumnado a Biblioteca organizou unha charla con Mónica Justo, ilustradora de Ribadeo. O alumnado de 1º, 2º e 3º da ESO escoitou atentamente as verbas de Mónica Justo quen lles explicou cales son as distintas técnicas que ela emprega nas súas creacións, faloulles dos diversos tipos de ilustración que hai e mostroulles algunha das súas obras e libros nos que ela colaborou. Despois da charla, e dirixido ao alumnado voluntario da biblioteca así coma a todos os participantes dos clubs de lectura, a ilustradora impartiu un obradoiro no que todos puideron poñer en práctica a súa vea artística, sempre seguindo, eso si,  os consellos da nosa experta invitada.

Bótalle unha ollada as fotos desta intersante xornada:

 

Gonzalo Moure na nosa biblioteca

Na Biblioteca tivemos o pracer de recibir a visita de Gonzalo Moure, autor de coñecidas obras e que se achegou ao noso centro para falar concretamente de dúas, El síndrome de Mozart e Palabras de caramelo, a primeira das cales foi a obra lida polo alumnado do club de lectura de Música. Como xa fixera noutra ocasión que nos visitou, Gonzalo Moure cautivou ó alumnado presente coa súa cercanía e respondeu amablemente a un bo número de preguntas que lle plantexaron.

Aquí podedes ver as fotos da súa visita:

Club de lectura de Lingua Castelá

E de novo volvemos con novas relacionadas cos clubs de lectura da Biblioteca. Nesta ocasión trátase do club de lectura de Lingua Castelá. Jose, xunto cun grupo de sete alumnos de 3º de ESO e unha alumna de 4º, comezaron a lectura de Invisible, unha emotiva novela escrita por Eloy Moreno que se achega ao tan actual problema do bullying. Sen dúbida un libro que suscitará interesantes reflexións nas sesións que de aquí a xuño lles esperan a este grupo de estudantes.

0d9a5308-a8ce-4487-ac65-30736b4c8667

Primeira sesión do club de lectura de Matemáticas

Un novo club de lectura botou andar na Biblioteca do centro. Nesta ocasión foi o club de lectura de Matemáticas, coordinado por Rubén, profesor de Matemáticas, e que conta cun grupo de sete alumnas de 1º da ESO. O libro escollido é Hasta el infinito y más allá de Clara Grima, publicado por Espasa e que se achega ó mundo das matemáticas a través de Mati que axudará a resolver os problemas cotidianos que lle plantexarán Sal e Ven. ¡A gozar da lectura e das mates!

 

aa4f797f-29cb-45a2-93f1-606aee08a5ed

Mes da ciencia en galego nas Bibliotecas

Agora que xa rematou o mes de novembro xa podemos traervos as imaxes e as nosas impresións de todo o que aconteceu durante o mes pasado na nosa Biblioteca.

Os departamentos de Física e Química, Matemáticas, Bioloxía e Tecnoloxía achegaron á Biblioteca todos os seus coñecementos, ideas e ilusión para que todo o alumnado e o profesorado interesados se pasasen durante os recreos a gozar de experiencias moi divertidas e interesantes.

Na primeira semana, María Jesús, a profesora de Física e Química, organizou unha exposición na Biblioteca e incluso levou a cabo experimentos que mantiveron moi atentos aos alumnos que se mostraron interesados en asistir. As Matemáticas foron as encargadas de invadir a Biblioteca na semana seguinte. Nesa ocasión, máis que Matemáticas foron Matemáxicas, xa que as actividades consistiron en trucos de maxia relacionados con esa materia: os alumnos sorprendéronse e mesmo aprenderon a facer eles mesmos eses trucos que Sabela, Rubén e Pablo lles ensinaron gustosamente. Despois das Matemáticas, foi a Bioloxía a que se achegou á Biblioteca: de novo exposicións de maquetas realizadas polo alumnado, exposicións de traballos sobre os minerais, etc. Finalmente o departamento de Tecnoloxía, con Paula e Pablo, trouxo a robótica ao medio dos libros. Os alumnos presentes na exhibición pasaron un bo rato xogando cos robots que durante un recreo conviviron con todos os libros da nosa Biblioteca.

Dende o Equipo de Biblioteca queremos agradecer aos departamentos que colaboraron coa organización deste Mes da ciencia en galego nas Bibliotecas e por suposto tamén queremos darlle as gracias a todos os alumnos que se pasaron nos recreos a gozar do amplo abano de actividades que alí se organizaron.

Día das Librerías

A Biblioteca quixo aportar o seu grao de area para conmemorar o Día das Librerías deste ano. Para isto deseñamos un cartel coa finalidade de que as dúas librerías da Pontenova, Josgua e Papeleo, e a librería de Riotorto, Acuarela, o lucisen nos seus escaparates. Xunto cos carteis tamén entregamos ás librerías distintos marcapáxinas creados por nós para que durante ese días os regalasen con cada libro vendido. Os encargados de facerlle chegar o material ás tres librerías foron os voluntarios da Biblioteca. Gracias a eles e gracias a Josgua, Papeleo e Acuarela por adornar os vosos negocios co noso cartel.

Club de lectura de Música

Xa tenos un dos clubs de lectura funcionando, en concreto o de Música. O libro escollido por Elena, a profesora de Música, foi El síndrome de Mozart de Gonzalo Moure, publicado pola editorial SM e que se alzou co Premio Gran Angular no ano 2003. Neste club participan alumnos e alumnas de 2º e 3º de ESO.

libro

Aquí podes ver as imaxes da primeira sesión do club:

 

Semana do terror na Biblioteca

Con motivo da chegada do Samaín, a Biblioteca quixo sumarse a esta celebración, para o que coa axuda dun grupo de alumnos de 2º de ESO conseguimos cambiar o aspecto deste espazo e trasnformalo nunha terrorífica biblioteca repleta de pegañosas teas de araña, noxentos insectos e ratos, morcegos e sinistras cabazas iluminadas, pero sobre todo chea de ilusión por atraer durante unha semana ao alumnado do centro. O motivo: tres xornadas de proxección de curtametraxes de terror nos recreos. Como non podía ser doutro xeito, non faltaron as palomitas, a escuridade e os berros de todos os que encheron o noso “patio de butacas”. Sen dúbida pasámolo todos moi ben, nos previos organizando todo, e nos tres recreos nos que nos acompañou un bon número de alumnos e profes.

Dende a Biblioteca queremos agradecer a axuda do alumnado que moi ilusionado colaborou na decoración, e dun xeito moi especial a nosa repartidora de entradas, Ainara, “la niña del pozo”, que se encargou de recibir aos asistentes as proxeccións na tenebrosa porta da nosa particular sala de cine.

¿Queres ver o que aconteceu durante a Semana do terror na Biblioteca? Aquí tes unha pequena mostra: